Tuman ang kalipay sang Top 1 sa April 2023 Electronics Engineering Board Exam nga tumandok sa La Carlota City sa iya nga nangin achievement.
Sa interview sang Bombo Radyo Bacolod kay Engr. Joshua Aniken Acusta, 4th year college pa lamang ini sa Iloilo Science and Technology University (ISAT-U), handom na niya nga mangin top notcher kun magkuha sang board examination.
Tubtob sa karun, tuman ang kalipay sini kasubong man pagpadayaw sang iya nga pamilya sa iya nga nalab-ot.
Plano naman sini nga magpauli sa 3rd ukon 4th week sang bulan sang Mayo bangod ini ang magatambong pa sa event sa ISAT-U sa ikaduha nga semana kun sa diin siya ang magapatigayon sang testimonial program.
Paathag ni Acusta nga ginpili sini nga magkuha sa Electronic Engineering bangod ang lolo sini ang isa ka Mechanical Engineer samtang Electrical Engineer naman ang iya nga amay, gani napinsaran sini nga magkuha sang iban naman nga field sang Engineering.
Siya ang naggradwar sa Pax Catholic Academy sa syudad sang La Carlota tubtob sa magtapos sa Junior Highschool samtang sa University of San Agutin Iloilo naman ini nagkuha sang Senior High School sa strand nga Science Technology, Engineering and Mathematics (STEM) kun sa diin siya ang nagpuyo sa balay sang iya tiya tubtob na sa kolehiyo.
Si Acusta ang scholar man sa idalum sang Department of Science and Technology (DOST).
Suno diri, siya ang mahuyugon gid sa mga panibag-o nga teknolohiya samtang siya ang math lover man nga dako nga factor sa pagpili sini sang kurso nga Electronic Engineering.
Dugang pa sini nga ginpili niya ang mag-eskwela sa ISAT-U sa rekomendasyon sang iya nga best friend nga si Dante John Robles, nga amo naman ang nag-top 4 sa Electronics Technician Licensure Examination (ECT) Board Exam.
Aminado si Acusta nga sang matapos ang exam, nagpinsar pa ini nga siya ang indi malakip sa Top 10 gani dako ang iya nga pagpasalamat sang naggwa ang result.
Wala naman ini nagpinsar nga magaviral ang gin-upload sang magulang sang iya nga nobya nga video sa social media kun sa diin tuman ang kalipay sang girlfriend sini nga siya ang nangin top notcher sa pasinawan.
Paathag ni Acusta nga ang nobya sini amo ang una nga nagpahibalo sa iya nga siya ang Top 1 sa April 2023 Electronics Engineering Board Exam.
Dugang pa sini, nga wala naka-upang sa iya ang relasyon sa baylo ini ang nagabulig sa iya mental health partikular na kun siya ang nagadangat sa ponto nga tuman na ka stress kag nagakinahanglan sang emotional support.
