BACOLOD CITY — Nagaplano ang number 1 sa Interior Designer Licensure Examination nga magtukod sang negosyo nga furniture diri sa ciudad sang Bacolod subong nga nakapasar na ini sa board exam.
Si Paulyne Kate Genson nga nakakuha sang 86.20 percent nga rating ang naggraduate sa University of the Philippines Diliman apang siya ang tumandok sang Barangay Mansilingan, ciudad sang Bacolod.
Sa resulta nga ginpagwa sang Professional Regulation Commission sang Nobyembre 24, si Genson ang nagpanguna sa 113 ka mga examinees nga nakapasar sa pasinawan nga ginhatag sang nagligad nga bulan sang Nobyembre.
Sa interview sang Bombo Radyo, ginpahayag ni Genson nga ginalantaw niya ang iya kaugalingon nga isa na ka tag-iya sang furniture manufacturing company sa Bacolod, lima tubtub napulo ka tuig halin subong.
Suno diri, may yara sang una sang kaangay sini nga negosyo ang ila pamilya apang nag-untat gani iya padayunon.
Aminado si Genson nga tuman ang kalipay sang iya mga ginikanan sang ila nahibaluan nga nakapasar ini sa board exam bangud mabawi na ang tanan nila nga pangabudlay.
Ikaduha na nga kurso ni Paulyne Kate Genson ang BS Interior Design nga iya gintapos sa University of the Philippines Diliman.
Ginpahayag ni Genson nga una siya nagkuha sang BS Electrical Engineering bangud amo ini ang kurso nga natapusan sang iya amay.
Apang sang nagaeskwela na ini, nagtahaw ang iya interes sa BS Electrical Engineering rason nga siya ang nagshift sa BS Interior Design.
Nagpasalamat naman ini bangud apisar nag-uyang siya sang oras, hugot ang suporta sang iya mga ginikanan.
Sang natapos na niya ang kurso, nagreview si Genson bilang preparasyon sa pagkuha sang board exam.
Suno diri, wala siya naglaom nga magapanguna siya sa pasinawan bangud sang kolehiyo, wala man ini sang nakuha nga honors.
Bangud sini, ginakabig ni Genson nga bonus ang iya pagpanguna sa Top 10.
Aminado ini nga nabudlayan siya sa pasinawan apang nangin optimistic ini nga siya ang makapasar.
Ang interior designer ang nagtapos sang iya elementarya kag high school sa Saint Scholastica Academy sa Bacolod.
