Halos walo tubtob napulo ka oras kada adlaw ang pagtoon sang nakapasar sa Radiologic Technologist Licensure Examination nga nagtop 6.
Sa interview sang Bombo Radyo kay John Vincent Remollo, ulihi ini nga nakabaton sang honors sang elementary pa kag wala man ini naggradwar bilang Cum Laude.
Suno diri, indi gid sini malipatan samtang nagareview nga halos adlaw-adlaw wala gid sang adlaw nga wala sila nagatoon.
Suno kay Remollo, luyag kun tani sini nga pasakaon sa stage ang iya ginikanan sa iya paggradwar apang wala man ini sang honors.
Bangod sini, nagtinguha siya nga magtoon sang husto para madala sa top sa board exam.
Pahayag ni Remollo, nahatag man ini sang tion para sa iya kaugalingon indi maburn out kaangay sa paghampang, pagtukar sang gitara, pagservice sa simbaha, kag paglagaw.
Mensahe sini, ang maid-id nga pagtoon kag pagpangamuyo may dako nga bulig sa paglab-ot sang handum. Samtang, halos indi makapati ang graduate student sang Riverside College Bacolod nga nakapasar sa Radiologic Technologist Licensure Examination nga makuha ang top 4.
Sa interview sang Bombo Radyo kay Kirby Neil Magallanes Tabay, goal lamang sini nga makasulod sa top 10 amo nga tuman ang iya kalipay nga makita ang iya pangalan sa top 4.
Suno diri, gintutokan gid sini ang pagreview samtang yara sa Bulacan apang aminado man si Tabay nga sadto samtang naga-eskwela wala gid man siya maayo nagatutok gid sa pagtoon.
Suno sa iya, nagapartisipar pa ini sa student council kag dance group sa ila buluthuan kag wala man ini naka-agi pulaw agud magtoon.
Siya naka-eksperyensya nga magpulaw na lamang sang yara na ini sa review center.
Pahayag sini, sa iya pagtoon, ginasigurado gid sini nga may yara gid siya sang matun-an.
Sa karun, plano anay sini magpahuway kag mangita sang trabaho sa Manila.
