Ginaduso sang chairperson sang Committee on Transportation and Traffic sa Sangguniang Panlungsod sang Bacolod nga mapatuman ang total truck ban sa circumferential road.
Sa interview sang Bombo Radyo Bacolod kay Councilor Al Victor Espino, luyag sini nga matotal truck ban ang circumferential road bangod yara naman ang Bacolod Negros Occidental Economic Highway (BANOCEH) nga mahimo malabayan.
Madumduman nga ginpahanugutan lamang nga makalabay sa BANOCEH ang mga dalagko nga salakyan sang Masskara Festival bilang kabahin sang rerouting.
Suno kay Espino, antes maghimo sang ordinansa, luyag niya nga matun-an anay sang Bacolod Traffic and Transport Management Department (BTTMD) ang implementasyon, bangod sila ang may otoridad diri, kag maghatag na lamang sang rekomendasyon sa Committee on Transportation and Traffic.
Target sang plano nga mapahagan-hagan ang kabug-aton sang trapiko sa circumferential road partikular na sa tion sang rush hour.
