Nakabatun na sang tig-P30,000 ang mga totally damage ang balay sa sunog nga nagluntad sa Brgy 27, Bacolod City sang Setyembre.
Sa interview sang Bombo Radyo Bacolod kay Chelzy Jane Caspe, Senior Community Support Services Officer sang National Housing Authority – Bacolod, 145 ang mga fire survivors nga nahatagan sang financial assistance nga ginabug-usan sang 144 ka totally damaged ang balay kag isa nga partially damaged.
Ang partially damage ang balay ang nakabatun naman sang P10,000.
Ang Emergency Housing Assistance Program (EHAP) ang ginpatigayon sa lobby sang Bacolod City Government Center.
Nangin madasig naman ang distribusyon bangod wala na sang madamo nga rekisitos.
Suno kay Caspe, sila ang nagakoordinar na lamang sa Department of Social Services and Development para sa masterlist.
Ang DSSD na ang nagpatigayon sang validation tubtob sa pagtipon sang mga kinahanglan nga dokumento.
Nagalaom si Caspe nga ang nabatun nga financial assistance ang gamiton sa pagpakay-o sang balay sang mga nasunugan.
Sa impormasyon sang Bombo News Team, madamo sa mga pumuluyo ang nakasugod na sa pagkay-o sang ila balay, gani ang kwarta nga nabatun ang ila na lamang idugang agud matapos na.
Samtang may iban naman nga natapos na sa pagkay-o kag ang kwarta ang gamiton na lamang sa pagbakal sang mga kagamitan sa sulod sang balay, bangod ang ila nga mga pagkabutang ang ginlamon man sang kalayo.
