Aminado ang Provincial Tourism Office sang Negros Occidental nga maganubo ang pagtubo sang sektor sang turismo subong nga tuig bangud sa COVID pandemic.
Kadungan sang 20th Tourism Celebration sang probinsya subong nga semana, aminado si Negros Occidental Provincial Tourism Officer Jennylind Cordero nga mapugday gid ang turismo subong nga tuig.
Suno diri, madamo nga tourism destination sa probinsya ang nagsira tuga sang pandemic.
Santo sa comparison record, nagnubo sang halos lima ka porsyento ang mga nag-abot nga turista sa probinsya kun ikumparar ang 2018 kag 2019.
Sadtong 2018, nakarecord ang probinsya sang 935,421 ka mga tourist arrival samtang 858,995 naman ang narecord sang 2019.
Suno kay Cordero, natunga sa duha ka kategorya ang mga turista kag ini ang ginalakipan sang overnight tourist kag day time tourist.
Tinalikdan nga tuig, nakarecord ang probinsya sang kabug-usan nga 858,995 ka overnight tourist samtang ang day-time tourist naman ang ginalakipan sang mga residente sa probinsya nga nagalibot sa paglagaw ang may kabug-usan nga 2,241,715.
Suno kay Cordero, ang mga nagapanguna nga nationality sang turista sa probinsya amo ang American, Korean, German, Belgians kag French.
Samtang ang masami naman nga padulungan sang mga turista amo ang District 3, District 4 kag District 6.
Samtang ang mga outbound naman ukon naggwa nga turista nagikan sa probinsya ang nagdangat na sa 840,209.
Ang pagnubo ang ginalantaw nga bangod sa pagbag-o sang local government units (LGU) kag pagbag-o sang alkade sa mga ciudad kag banwa nga nagatuga man sa pag-ilis sa mga tourism officers.
Bangod sini, liwat naman nga nagatrain ang probinsya kag amat-amat pa ang mga ini nga ginatudluan.
Gina-ekspektar naman ang pagkapugday sang tourism data subong nga tuig, apang pagatinguhaan sang probinsya nga mapasaka ini sa masunod nga mga tinuig.
