BACOLOD CITY — Balik sa normal ang trabaho sa Taipei, Taiwan kasunod sang magnitude 6.4 nga linog nga nagluntad sa Hualien kagab-i.
Sa exclusive interview sang Bombo Radyo Bacolod, ginpahayag ni April Grace Penacuba sang Barangay Ara-al, La Carlota City apang nagatrabaho sa Wuku District, Taipei City, nga wala sang ginpatuman nga suspension sang trabaho subong nga adlaw.
Natabuan nga yara kagab-i sa trabaho si Penacuba sang nagluntad ang linog alas 11:50 sa gab-i.
Nasaksihan gid sini ang pag-uyog sang mga machine sa factory sang medical equipment nga iya ginatrabahuan rason nga siya ang ginkulbaan.
Ang pagtay-og suno sa iya ang naglawig sang tatlo tubtub apat ka minutos.
Gilayon man sila nga nakabaton sang emergency alert tuhoy sa linog.
Apang matapos ang pagtay-og suno sa Negrense, nagbalik man sila sa pagtrabaho.
Sa pihak sini, wala man sang building nga naghilay ukon nahalitan sa Taipei City.
Gindula man ni Penacuba ang kahangawa sang iya pamilya sa La Carlota bangud luwas ang ila kahimtangan.
