Magauntat biyahe ang transport group sa sulod sang duha ka adlaw sa katapusan sang bulan sang Enero, 2025.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters Operators and Drivers Inc. (BACOD)-Manibela, ginfinalize na sang ila grupo kaupod ang UNDOC, KNETCO kag iban pa nga transport groups sa Western Visayas ang ila patigayunon nga untat biyahe ukon rally protesta sa Enero 27 tubtob Enero 28.
Suno kay Catedral, sa subong magakuha na sila sang permit para sa ila nga safety kag malikawan man ang pagdisperse sa ila sang mga kapulisan.
Tatlo ang pagahamtangan sang rally center nga ginalakipan sang Flyover sang Magsaysay, Flyover sang Bata kag ang isa ang yara sa bangga patyo sa Burgos samtang magabutang man sa Bacolod City Public Plaza.
Indi man mangin upang sa ila kun wala sang permit bangud madayon sa gihapon ang untat-biyahe kag rally protesta kun sa diin patigayunon nila sa Freedom Park ukon Bacolod City Public Plaza.
Wala man sang pagbag-o ang rason sang ila nga paguntat biyahe kag rally protesta kundi ang panawagan sa indi pagdula sang traditional jeepney nga palangabuhian sang magagmay nga drivers kag operators.
Dugang pa ni Catedral nga para man ini sa mga commuters nga indi magmahal ang ila nga pletehan inkaso nga madula ang traditional jeepneys.
