Naghusayay na ang mag-asawa kag ang traffic enforcer nga nagtaas ang tingog sa ila samtang nagapaathag sang traffic violation sa BS-Aquino Drive-Lacson Streets sang Miyerkules sang hapon.
Kaina sang aga, nag-atubangay sanday Traffic Aide 1 Chris Aragon kag ang mag-asawa nga sanday Rejie Desuyo kag Joan Ducay sa Bacolod Traffic Authority Office sa presensya sang pinuno nga si Police Major Junji Liba.
Sa interview kay Liba, nalipay ini nga naistorya niya ang mag-asawa kag ang traffic enforcer.
Suno kay Liba, aminado ang magtimbang nga bahin nga pareho sila nga may sala apang nag-istorya ang mga ini agud masettle.
Halin kahapon, ginkakas si Aragon si BS Aquino Drive-Lacson Streets kag ginsaylo sa iban nga post nga indi malabayan sang ruta ni Desuyo agud malikawan ang kaangay nga sitwasyon sa palaabuton.
Sa interview sang Bombo Radyo kay Aragon, iya gin-athag nga wala ini nagadumot kanday Desuyo kag Ducay.
Suno diri, ginhimo lang niya ang iya trabaho nga sawayon si Desuyo sa iya nga violation apang wala ini nakaissue sang citation ticket bangud wala sila sang dala.
Suno kay Aragon, ginhambalan lang niya si Ducay nga indi pagtolerahon ang iya bana nga indi maayo magsabat sa traffic enforcer.
Gin-athag ni Aragon nga wala ini nagadumot sa mga driver nga ila makabais bangud trabaho lang ini.
Iya man ginpasalig nga himuon ang nagakadapat nga aktwasyon sang isa ka traffic enforcer kag indi mag-abuso sang authority.
Si Aragon ang regular employee kag masobra 20 anyos na nga traffic enforcer sang Bacolod.
Suno kay Ducay, nag-ako sang sala ang magtimbang nga bahin kag nagpasensyahanay.
Nagpangako man ang mga ini nga indi na masulit ang natabo.
Ginpahayag man ni Desuyo nga indi na niya pagliwaton ang aktwasyon.
Naghingyo man ang misis sa mga netizens nga indi na pagpakamaluoton si Aragon bangud sila ang nagpasensyahanay na.
