Madamo pa sang kulang sa numero sang mga traffic enforcers sa ciudad sang Bacolod.
Sa interview sang Bombo Radyo Bacolod kay Atty Reuben Sabig, officer in charge sang Bacolod Transport and Traffic Management Department, sa nakaligad nga administrasyon ang Bacolod Traffic Authority Office ang may 50 nga plantella position, 250 ang Job Order, ukon kabug-usan nga 300 ka personnel.
Apang sa karun, 215 na lamang ang nabilin nga personnel, gani 85 pa ang ila kulang.
Aminado naman si Robello nga indi sila basta makapangayo sang tawo bangod madamo man sang mga departamento nga ginakulang sang personnel.
Sa karun sila ang nagadeploy pa sang traffic enforcers sa mga masako nga intersections nga wala sang traffic lights, kun sa diin duha tubtob tatlo ka traffic personnel ang nagatawo.
Ginatinguhaan naman nga matakdan na sang traffic lights ang mga masako nga intersection agud madeploy ang mga traffic enforcers sa mas nagakinahanglan sang deployment.
Suno kay Sabig, ang Bacolod City Engineers Office ang incharge sa pagkay-o kag pagtakod sang traffic lights samtang ang Office of the City Mayor naman sa supervision.
Paathag sini nga wala pa sa ila ginpakapyot ang trabaho bangod sang Enero ukon Pebrero lamang nakasugod ang pag-operar sang BTTMD, apang mahimo nga ang trabaho ang mapasa naman sa ila sa masunod nga tuig.
