Ginpakigbahin sang pinuno sang Traffic Management Unit kag Bacolod Traffic Authority Office (BTAO) nga 95 porsyento na sa ila mga personnel ang nabakunahan na batok sa COVID-19.
Suno kay P/Maj. Ruel Culanag, sa masobra 500 ka mga personnel, yara na sa 95 porsyento ang nakapabakuna sang COVID-19 vaccine.
Samtang ang nabilin naman nga lima ka porsyento amo ang mga may deperensya sa ikaayong lawas kaangay sang highblood, alergies ukon may maintenance nga bulong kag wala nakapasar sa screening process antes mabakunahan.
Paathag pa sini nga sa local government unit (LGU) sang syudad sang Bacolod ang mga ini ginbakunahan kag ginrequire man ang mga ini nga magpasa sang photocopy sang ila nga vaccination card.
Ginpatpat man sini nga 100 porsyento na sa mga regular nga personnel ang nabakunahan kag yara sa 95 tubtob 98 porsyento ang bakunado sa mga job order employees.
100 porsyento naman sang mga kapulisan nga assigned sa traffic management ang nabakunahan na sang COVID-19 vaccine.
Iban sa mga ini ang fully vaccinated na ilabi na ang nakabatun sang single dose nga Johnson and Johnsons vaccine samtang may iban nga nagahulat pa sang 2nd dose.
