Plastado na ang traffic plan para sa Panaad sa Negros Festival 2026 nga opisyal nga pagabuksan subong nga adlaw, Abril 13, 2026.
Sa interview sang Bombo Radyo Bacolod kay Bacolod City Police Office-Traffic Enforcement Unit Head Police Major Elmer Bonilla, natapos na ang mga preliminary meeting agud nga handaan ang management sang trapiko sa bahin sang Panaad Park and Stadium sa Barangay Mansilingan, Bacolod City nga patigayunan sang isa ka semana nga selebrasyon sang Panaad sa Negros 2026.
Suno kay Bonilla, as suggested sa meeting ipatuman nila ang traffic plan sang nagligad nga mga tinuig sa pagselebrar sang nasambit nga aktibidad.
Ang entrance ang yara sa gihapon sa Alijis halin sa Lopues kag one way lamang ang pasulod sa Panaad kag ang exit ang yara sa bahin sang Mansilingan.
Magahatag man ang Traffic Enforcement Unit sang konsiderasyon sa mga magalabay nga salakyan sang mga masulod sa mga subdivisions sa sulod sang Panaad apang kun magwa ang exit ang yara naman sa Alijis sa bahin sang Regent padulong sa isa ka Montessori School.
Dugang pa ni Bonilla nga ipatuman man ang one way parking.
Ginapasugtan man sang Negros Occidental provincial government kag Traffic Enforcement Unit nga indi magsunod sa one way parking ang mga salakyan nga dala sang mga delegado bangud may mga dala ang mga ini sang produkto nga idisplay sa tagsa ka booth sa Panaad.
May mga augment man sa TEU personnel nga Barangay Tanods sang Barangay Mansilingan kag Barangay Alijis.
Sumugod alas 8:00 subong nga aga, Abril 13 ipatuman na ang one way sa dalanon sa Panaad.
Nagpanugyan man ini sa mga magalagaw nga nagpagwa naman sa social media page sang Negros Occidental Province ang traffic plan kag ginpakigbahin man sang mga mainstream media sa social media gani isundon nalang nila ini.
