Natalana nga magpagwa ang Bacolod City Public Information Office sang version sang route plan para subong nga Masskara Festival 2023, nga mas mahapos mahangpan sang mga pribado nga motorista.
Sa interview sang Bombo Radyo Bacolod kay Bacolod Traffice Authority Office (BTAO) Head Police Major Junji Liba, nagmeeting ang mga ini sang Sabado kaupod sa Bacolod PIO kag kay Bacolod City Administrator Atty. Pacifico Maghari III agud maathagan ang mga issues sa traffic plan.
Bangod indi tanan ang makahangop sa graphics design para sa rerouting kag road closure, ginpahayag sang Bacolod PIO nga sila ang magahimo sang ginpasimple nga version nga nakatutok sa pagpahanumdom nga indi malabayan ang pila ka mga areas sa natalana nga mga petsa.
Paathag ni Liba nga magluwas sa mga signages, may-ara man sang mga traffic enforcers nga nagabulig sa paggiya sa mga motorista.
Ang graphics sang traffic plan ang una naman nga ginpanagtag sa mga operators sang nanarisari nga public transportations.
Aminado si Liba nga ang wala lamang napanagtagan amo ang mga pribado nga motorista, gani bangod sa nadelay nila nga pagpagwa sang rerouting plan, nagalaom ini sa bulig sang radio, kag iban pa nga media outlet agud makalab-ot sa publiko ang impormasyon sa pagbag-o sang traffic routes.
Paathag sini nga gamay lamang ang ila nga ginbag-o gikan sa traffic route plan sang nakaligad nga Masskara Festival.
Suno kay Liba ang ila sa karun nga graphics nga Google captured ang may-ara man sang nakabutang nga arrows nga nagatudlo sang ruta samtang magluwas diri may-ara man sang written instructions sa kilid.
Sa traffic plan, apat lamang ka area ang mayor nga apektado bangod sa road closure kag rerouting.
Humalin sang Oktobre 6 tubtob na sa 23, ang Bacolod City Public Plaza ang siraduhan kada alas-3:00 sang hapon tubtob alas-5:00 sang kaagahon, gani day time lamang mahimo makalabay sa area.
Maga-umpisa naman sa Oktobre 16 ang pagplastar sang venue sa Dalan Lacson kun sa diin may ipatuman nga partial kag total closure sang dalan.
Sa mga dalan nga ipaidalum sa partial closure, ini ang saraduhan humalin alas-3:00 sang hapon tubtob alas-5:00 sang kaagahon nga mangin epektibo humalin Oktobre 16 tubtob 23.
Samtang sa Oktobre 21, isarado man ang Circumferential Road sa Burgos Street tubtob sa St. Francis Avenue para sa Electric Masskara halin alas-6:00 tubtob alas-9:00 sang gab-i.
Pahanumdom ni Liba nga indi gid malikawan ang paggutok sang trapiko sa pila ka area nga patigayunan sang rerouting ilabi na kun madamo sang mga pampubliko nga salakyan ang nagalabay nga ginadugangan pa sang pribado nga mga salakyan.
