Nagnubo sang 43 porsyento ang traffic violations nga nakumiter sa ciudad sang Bacolod humalin Nobyembre 1 tubtob Desyembre 1.
Sa interview sang Bombo Radyo Bacolod kay Bacolod Traffic Authority Office Head Patrick Leonard Lacson, sa ila assessment nakita nga nagbehave ang publiko sa ciudad nga mahimo tuga sang kahadlok nga matow ukon ma clamp ang ila nga salakyan kun sila ang indi magsunod sa traffic rules, ukon sila ang maticketan.
Bangod sini, nagnubo ang revenue ukon deposito sa ciudad kun koleksyon sa violation tickets ang paghambalan, kag sa karun aminado si Lacson nga ini ang ginalaragway na nga kaangay nga ginadisiplina sang mga traffic enforcers ang Bacolod City.
Apang magluwas sa maayo nga epekto, ginakilala man sang BTAO head ang mga ginakabig nga negatibo nga epekto sini.
Ini bangod may pila naman ka mga business establishments ang nagareklamo nga nag-iban ang ila mga customers bangod nagakahangawa na sila sa pagpark sang ila mga salakyan.
Apang panindugan ni Lacson, ginabuhat lamang sang BTAO ang ila responsibilidad.
Suhestyon man sini nga kuntani matun-an sang Sangguniang Panlungsod nga mabalanse ang pagresolbar sa problema sa trapiko kasubong man sa concerns sang business sector.
Sa pihak nga bahin, padayun pa ang assessment sang BTAO sa traffic situation subong nga Desyembre, Yuletide season bangod sa pagpamangkot sini sa mga traffic enforcers, doble ukon triple ang mga nagasulod nga salakyan sa ciudad sa nasambitan nga bulan.
Sa record, ang average nga salakyan nga nagasulod sa Bacolod City sa bilog nga tuig, ang yara sa 110,000 vehicles.
