Ginpahayag sang outgoing city administrator sang Bacolod nga nagakaangay lamang ang Hunyo 22 nga petsa para sa initial meeting sang transition team sang outgoing kag incoming nga administrasyon.
Sa interview sang Bombo Radyo kay Atty. Edward Joseph Cuansing, apisar nga nagahambal ang palaabuton nga administrasyon sa pagpamuno ni Mayor-elect Albee Benitez nga mas maayo kun mas timprano ang petsa sang ila initial meeting, sa bahin naman sang outgoing administration, nagakaangay lamang ini bangud madamo sang ginarequire nga dokumento ang memorandum circular sang Department of the Interior and Local Government (DILG).
Suno kay Cuansing, kun magmeet sila sa mas timprano nga petsa, wala paman sang may ipakita ang outgoing administration bangud indi pa makumpleto ang mga requirements apang kun sa Hunyo 22, daw halos tanan nga kinahanglanon ang makumpleto na.
Suno sa iya, sa idalum sang DILG memorandum circular, dapat nga ipreparar ang mga dokumento agud ini ang mangin ready kag accessible para sa masunod nga administrasyon.
Suno pa diri, ginasiguro man sa transition nga nahanda na sang mga department heads ang mga nagakaigo nga dokumento.
Igatugyan sa masunod nga administrasyon ang imbentaryo sang mga propedad sang ciudad, development plans, comprehensive plans, mga reports kag ang seal of good local governance compliace.
May pila naman ka mga executive assistant nga nagresign na apang suno kay Cuansing, sila ni City Legal Officer Atty. Joselito Bayatan ang ulihi nga magaresign bangud sila ang kabahin sang transition team apang nakapasa naman ang mga ini sang courtesy resignation kay Mayor Bing.
