Ginpahayag sang chairman sang Sentrong Samahan ng mga Tsuper at Operators Negros (SSTONE) nga halos tanan nga pasahero ang nagasala sa bag-o nga routa sa idalum sang Local Public Transport Route Plan (LPTRP) sa ginapatigayon nga Simulation Exercise (SimEx) humalin Domingo tubtob subong nga adlaw.
Sa interview sang Bombo Radyo kay Albert Villanueva, daw kagamo gid sang routa sa karun kag may ginpasa sila nga petisyon nga i-review ukon i-suspend ang City Ordinance 966 nga nagasuporta sa LTPRP nga ginhimo sang local government unit nga wala sang nagakaigo nga konsultasyon kag insakto ang proseso.
Suno sa iya, sa tatlo ka adlaw, igareview nila ini kag igareport ang resulta.
Suno diri, nagasala sa karun ang mga pasahero apang basta may guide lamang sang bag-o nga LTPRP, wala man sang problema apang may pila ka routa nga wala man gihapon ginasunod.
Suno kay Villanueva, antes gin-implementar, wala ini ginreview, wala nag-agi sa nagakaigo nga proses kag ginrekta lamang sa Land Transportation Franchising and Regulatory Board.
Pagbalik sini sa ciudad, ginhimuan ini sang ordinansa agud matigayon ang loan sang mga kooperatiba sa bangko kag sa karun nga gin-implementa na, daw nagsabad kag problematic ini.
Pagkatapos sang SimEx, sila ang magatipon sang concerns sang kada routa kag tingob nga ipresentar sa LGU paagi kay City Administrator Atty. Pacifico Maghari.
