Ginapasalamat sang United Negros Drivers and Operators Center (UNDOC) nga naaprubahan na ang P1 Billion nga Fuel Subsidy para sa mga Public Utility Vehicle Drivers apisar nga wala pa sila sang kasiguraduhan kun san-o mabatun.
Pahayag ni UNDOC Secretary General Diego Malacad, wala pa sila sang ginapanguyatan nga memorandum natuhoy sa budget nga igapanagtag, kag nabatian pa lang sang mga ini nga na-aprubahan na ini pinaagi sa mga Broadcast Industries.
Suno diri, nagapasalamat ang mga ini sa hangin bangod wala paman nila mabatyagan ang derekta nga ayuda gikan sa National Government.
Isa man sa ginaduso sang grupo amo nga makatukod sang opisina ang Land Transportation Franchising and Regulatory Board (LTFRB) sa Negros Island.
Suno kay Malacad, ini ang dapat nga ayuon nanday Bacolod City Mayor Evelio “Bing” Leonardia kag Negros Occidental Governor Eugenio Jose “Bong” Lacson sa National Government.
Ini agud mangin mas mahapos para sa sektor sang transportasyon ang magpamangkot may kaangtanan sa mga benepisyo nga nagakadapat sa mga drivers.
Paathag sini nga humalin sang mag-umpisa ang COVID-19 Pandemic, nakabati naman ang mga ini sang mga plano nga paghatag sang financial assistance gikan sa National Government apang wala man ini nagakatabo sa Region 6.
Suno kay Malacad, padayunon nila ang plano nga Visayas-wide nga rally agud mapa-alinton sa National Government ang ila panawagan nga iderekta nalang sa drivers ang kwarta kag indi na maglabay pa sa kun sin-o kasubong man sa Land Bank bangod may mga database naman ang mga ini kun sa diin nakalista ang lihitimo nga drivers.
Samtang isa man sa ginabulubantayan sang UNDOC kung san-o maaprubahan sang Inter-Agency Task Force ang pagbalik sang 70 porsyento nga passenger capacity.
Dugang pa sang mga ini nga ginahingyo man nila nga isuspender ang Train 1 kag Train 2 nga layi kasubong na ang 12 percent Value Added Tax (VAT) sa gatong.
Pinaagi sini, ginalantaw sang UNDOC nga madamo sang mas makabenepisyo, indi lang ang industriya sang transportasyon.
