Ginpahayag sang secretary-general sang United Negros Drivers and Operators Center (UNDOC) nga dapat ang maghimo sang tikang ang local government agud mabatyagan sang administrasyon nga nagahangla ang mga drivers kag operators sa bilog nga pungsod bangud sa asod-asod nga pagsaka sang presyo sang produktong petrolyo.
Kahapon, isa nanaman ka round sang big time price hike ang gin-implementar kun sa diin P2.80 ang ginsaka sa kada litro sang gasolina, P2.25 sa kada litro sang diesel kag P2.40 naman sa kada litro sang kerosene.
Sa interview sang Bombo Radyo kay Diego Malacad, nakit-an sini nga ang subong nga administrasyon ang wala sang plano nga magbulig sa public transport kag pabay-an na lamang ang transport sector nga malumos tubtob nga indi na makaginhawa kag maghalin na lamang sa ila profession.
Suno diri, ang kwarta nga ipakaon pa kuntani sang mga drivers sa ila pamilya apang husto lamang ini magkadto sa pangbakal sang produktong petrolyo.
Nagapati ini nga dapat mag-intervene ang nagakaigo nga ahensya sa padayon nga pagsaka sang presyo sang gatong kag indi pag-isalig tanan sa Presidente.
Suno sa iya, ang local officials ang dapat nga mangin conscious man agud mangin tingog sa lokalidad.// Ginhangkat man ni Malacad ang mga pumuluyo nga maghulag kag indi mangin passive.
