Na-antisipar na sang United Negros Drivers and Operators Center (UNDOC) ang pagpatuman sa ika-tatlo nga tranche sang fuel excise tax nga yara sa idalom sang TRAIN law.
Sa interview sang Bombo Radyo Bacolod kay UNDOC secretary-general Diego Malacad, ginpahayag sini nga nalauman na nila ang 3rd tranche sang excise tax sa mga produktong petrolyo.
Apang, nagahingyo ini sa gobyerno nga lantawon man ang kinahanglanon sang transport sector.
Nagalaom ini nga mahatagan sila sang mga benepisyo ukon programa nga makabulig man sa ila.
Nagpasalig naman ini nga wala sang pagtaas sa pletehan basta yara pa sa baseline nga P42 ang presyo sang gasolina.
Apang, suno diri, sa tion nga maglapaw sa P42 ang presyo sang produktong petrolyo mapilitan sila nga magpasaka sang plete tubtob sa P10.
Sa karon, naga-apelar si Malacad nga bantayan gid sang publiko ang dalagan sang ekonomiya sang pungsod.
Nagapati ang secretary-general sang United Negros Drivers and Operators Center (UNDOC) nga indi pa mapatuman ang jeepney modernization program sang gobyerno sini nga tuig.
Nahibaluan nga nakatalana nga ipatuman ang nasambit nga programa sa June 19, 2020 kun sa diin pila ka public utility jeepney (PUJ) ang kinahanglan nga i-phase out.
Sa interview sang Bombo Radyo Bacolod kay Diego Malacad, UNDOC secretary-general, ginpahayag sini nga wala sang market ang mga modernized jeepney gani nagapati siya nga indi madayon ang pagpatuman sang programa sini nga tuig.
Iya man gin-athag nga wala sila nagapamalabag sa nasambit nga programa kundi wala sila nagahisugot sa corporative scheme nga himuon diri.
Suno kay Malacad, handa sila nga mag-sunod sa jeepney modernization program basta free enterprise lamang ini kag indi kooperatiba.
Isa pa sa ginapamatukan sini pananglitan nga madayon ang cooperative scheme amo nga magluwas sa pagdula sa mga daan nga modelo sang mga PUJ, plano man nga i-phase out ang iban nga mga drivers kag pasulabihon ang mga Pilipino nga naka-trabaho na abroad.
