Nagahingyo ang transport group sa mga pasahero nga buligan ang mga makaluluoy nga jeepney drivers sa tion nga mag-epekto na ang tuman nga pagsaka sa presyo sang gatong bangod sa nagapadayun nga tensyon sa Middle East.
Sa interview sang Bombo Radyo Bacolod kay Diego Malacad, Presidente sang Negros Bacolod Delta Transport Corporation, driver ang pinaka-apektado sa bigtime fuel price hike kag indi ang mga operators.
Ini bangod magmahal man ukon magbarato ang krudo, parehas gihapon ang bayaran nga boundary sang mga jeepney drivers sa operators.
Aminado si Malacad nga wala man sila sang mahimo kun magpadayun ang gyera sa Middle East.
Kun sila ang magarequest naman sang pasaka sa pletehan kag fuel incentives sa Land Transportation Franchising and Regulatory Board, ini ang magalabay pa sa public consultation, public hearing kag malawig pa nga proseso antes mapatuman.
Alegasyon sini nga nanamian ang LTFRB nga makita ang mga drivers nga naga-antos kag yara na sa ital-ital ang kabuhi antes ang mga ini magahulag.
Dugang pa sini nga sila ang ginalabugay pa sang Land Transportation Office.
Suno kay Malacad, bangod sa mga pagpanghangkat, nga nadugangan pa sang mga kalamidad, pila sa mga drivers ang nagasideline pa sa construction kag pagtrabaho sa kampo matapos ukon antes magbyahe.
Bangod sa kakulang kag kahinay sang hulag sang mga ahensya sang gobyerno, sila ang sa pasahero nagid lamang maga-ayo.
Hingyo sini sa mga nakadawa-dawa sa pagpangabuhi nga boluntaryo na lamang magdugang sang plete agud bisan paano mabuhin-buhinan ang palas-anon sang mga jeepney drivers.
