Ginpahayag sang chairman sang Bacolod Alliance for Commuters, Operators and Drivers, Inc. (BACOD) nga ang ciudad sang Bacolod ang may yara sang pinakagamay nga naconsolidate nga mga traditional jeepney sa bug-os nga Western Visayas.
Sa interview sang Bombo Radyo Bacolod kay Rudy Catedral, 23 percent lamang sang traditional jeepneys sa ciudad sang Bacolod ang nagpaconsolidate para sa Public Utility Vehicle (PUV) Modernization program samtang ang nabilin nga 77 percent ang wala nagpaconsolidate.
Suno kay Catedral, tuman ka diutay ang nagpaconsolidate nga traditional jeepneys.
Panindugan sini nga indi sila nga magapaconsolidate bangud indi ang mga ini luyag nga mangin kabahin sang korporasyon.
Suno diri, wala sila nagapamatok sa modernization sang mga salakyan sang publiko bangud mahimo man ang mga ini magrehabilitate sang iya nga mga salakyan santo sa tinutuyo sang PUV modernization program nga wala nagasulod sa kooperatiba.
Samtang, nangin madinalag-on man ang ila nga ginhimo nga protesta kahapon agud nga liwat ipadangat sa gobyerno nga indi ang mga ini magpaconsolidate sang ila mga jeepney units.
Ginpahayag man sini nga kahapon nakita nga kulang katama ang public transport bangud sa ginpatigayon nila nga pagprotesta.
Ginpasalamatan ni Catedral ang tanan nga nagaupod kag nagasuporta sang ila nga kawsa.
