Nagpanindugan ang pamunuan sang Bacolod Alliance Coalition for operators and drivers (BACOD) nga indi sila magpaconsolidate para sa jeepney modernization program kag nagpadala pa ang mga ini sang sulat sa korte suprema agud untaton ang consolidation kag tun-an ang Jeepney Modernization Program.
Sa interview sang Bombo Radyo Bacolod kay Rudy Catedral, chairman sang Bacolod Alliance Coalition for operators and drivers (BACOD), hugot sila sagihapon nga nagapamatok sa consolidation para sa Jeepney Modernization program gani nakaestoryahanay na sila sang presidente sang Manibela kag PISTON nga sa Disyembre 27 may patigayunon sila nga rally protesta kaupod ang mga pamilya sang driver ukon operator sang traditional jeepneys kag iban pa nga transport group sa probinsya sang Negros Occidental.
Ginpahayag man sini nga kun madayon ang deadline sang consolidation nga December 31, wala na sang mabiyahe nga traditional jeepney sa madason nga tuig agud nga mahibaluan sang gobyerno kun ano ang epekto sang palpak nga jeepney modernization program.
