Nakameeting kag may plano na ang pila ka mga transport federation sang traditional jeepney drivers sa ciudad sang Bacolod sa pag-upod sa panawagan nga nationwide transport strike sa Lunes, Nobyembre 20 tubtob Miyerkules, Nobyembre 22.
Sa interview sang Bombo Radyo Bacolod kay Rudy Catedral, Presidente sa Bacolod Alliance of Commuters, Operators and Drivers (BACOD), sila upod ang iban pa nga transport federation sa Bacolod kaangay sa United Negros Drivers and Operators Center (UNDOC), ang nakahanda na sa pag-upod sa panawagan sang National Transport Groups nga Piston kag Manibela.
Suno kay Catedral, nagahulat nalang sila sang final advice gikan kay Manibela Chairman Mar Valbuena, bangod ang BACOD-Bacolod ang associated man sa nasambitan nga Transport Federation.
Nagapanguna nga rasun kun ngaa maga-upod ang BACOD-Bacolod bangod ang agenda nila sa transport strike amo ang pagrenew sa deadline nga Desyembre 31 para sa provisional authority sang mga Traditional Jeepneys.
Ginapanawagan nila nga sila ang pahanugutan nga makarenew tubtob sa masunod nga tuig.
Suno diri nakapagkit sa Memorandum Circular number 2023-047 sang Oktobre 27, nga sarang marenew ang prangkisa kun magsulod sa modernization ukon consolidation.
Apang panindugan sang mag ini nga indi nila luyag mag-upod bangod ang consolidation ang nagakahulugan nga ang nagapanag-iya na sang prangkisa amo ang cooperatiba kag indi na mismo ang operator ukon driver.
Sa consolidation, ang extension sang prangkisa ang yara sa 6 months, 12 months ukon 27 months, nga padulong gihapon sa modernization kag pagkadula sang ila units.
Nakita man sang mga ini sang damlag lang nga gamay lamang nga delay madamo na sang nagakastranded sa dalanon gani panindugan ni Catedral nga kulang ang mga salakyan sa dalan kun dulaon ang traditional jeepneys.
Samtang… Pila sa mga driver sang traditional jeepney ang nagpahayag nga magaupod sa patigayunon nga transport strike sa Lunes.
Sa interview sang Bombo Radyo kay Andrew Jalandoni, nagabiyahe sang traditional jeepney nga Mandalagan-Libertad nga routa, magaupod ini sa patigayunon nga transport kun magaupod ang presidente sang ila nga asosasyon nga si Jonathan Mahilum.
Suno kay Jalandoni, wala man ini nagahinulsol kun mag-upod sa transport strike bangud para man ini sa kaayuhan sang tanan.
Indi man ini masami nagaupod sa transport strike bangud ginapili lamang sini kun kabilugan ang nagaupod.
