Indi makahibalo magrespeto sa layi ang mga nagrally-protesta nga mga katapo sang transport group sa ciudad suno sa assessment sang city director sang Bacolod City Police Office.
Sa interview sang Bombo Radyo Bacolod kay Police Col. Joeresty Coronica, ang assessment sang BCPO sa ginpatigayon nga rally-protest amo ang indi ang mga ini makahibalo magrespeto sa layi.
Suno kay Coronica, ang mga nagrally-protesta ang wala nagkuha sang permit indi kaangay sa mga nagarally sa ciudad sang Iloilo nga nagkuha sang permit.
Suno diri, bangud wala sang permit ang transport group ang ginpakadto na lamang sa freedom park ukon sa Bacolod City Public Plaza agud didto patigayunon ang nasambit nga aktibidad.
Apang gin-athag sang BCPO Director nga dapat sa sulod sang public plaza ang mga ini magapatigayon sang rally-protest kag indi sa atubang sang arko nga naga-occupy na sang isa ka lane sang dalan kag nagtuga sang huol sa publiko.
Ginsaway man sang mga kapulisan ang mga nagrally-protesta kag ginpaathagan nga dapat sa sulod sang public plaza ang mga ini magpatigayon sang nasambit nga aktibidad santo sa ordinansa.
Apisar nga ginakwestyon sang mga nagrally ang city ordinance nga nagadesignar sang Bacolod Public Plaza bilang freedom park, ini gid gihapon ang sundon sang kapulisan bilang kabahin sang ila trabaho sa pagbantay.
Ginpahayag man sang BCPO director, nga ginpanindugan sang nagapakilala nga abugado sang mga nagarally nga santo sa 1987 Constitution sila ang may constitutional right.
Aminado si Coronica nga husto ang ila panindugan, apang santo naman sa Batas Pambansa 880 dapat magkuha sang permit antes magpatigayon sang rally, kag kun wala sang rally permit ang aktibidad ang dapat patigayunon sa freedom park kag ipahibalo sa alkalde tatlo ka adlaw antes paman ang aktibidad, nga wala nahimo sang mga nagrally-protesta kahapon.
