Ginpanindugan sang National President sa Transport Group nga Pagkakaisa ng mga Samahan ng Tsuper at Opereytor Nationwide (PISTON) nga indi extension sang consolidation deadline ang ila nga ginapangayo, kundi ang pagbasura sang public utility vehicle (PUV) Modernization Program.
Sa interview sang Bombo Radyo Bacolod kay Modesto “Mody” Floranda, ginakilala nila ang ginhatag nga 15 days extension sa pagbyahe sang mga unconsolidated jeepney drivers, apang indi extension ang ila nga ginapangayo.
Panawagan sang mga ini nga ibasura ang PUV Modernization Program bangod ini ang nagahatag lamang sang kabudlayan sa mga drivers kag operators.
Suno diri, apisar nga makabyahe pa tubtob sa Mayo 15, madamo sa mga ini ang nagakahangawa bangod sa padayun nga pamahog sang Land Transportation Franchising and Regulatory Board (LTFRB) kag Department of Transportation (DOTr) nga sila ang kabigon na nga colorum kun indi magpaconsolidate.
Paathag ni Floranda nga ang prangkisa sa ila pagbyahe ang nakapagkit sa layi pinaagi sa Republic Act 4136 ukon Land Transportation and Traffic Code.
Apang sa pihak sini, wala na ginrenew sang LTFRB ang ila nga prangkisa.
Pahanumdom sini nga implementing body lamang ang LTFRB kag sila ang wala sang gahom nga makapauntat sang Akta Republika basi lamang sa ginpagwa nga PUV Modernization Program, nga isa lamang ka Executive Order.
Bisan ang pila ka mga Kongresista ang nagpahayag naman nga sila nga mga mamalidha ang nagahimo sang layi, gani yara man sa ila ang gahom sa pagligwat sini.
Suno diri, doble-doble na ang nangin paglapas sa ila kinamatarong.
Suhistyon naman ni Floranda nga mas maayo nga ibasura na lamang ang PUV Modernization agud indi na paligban sang gobyerno ang mga colorum nga public utility vehicles (PUVs).
