Ginpanindugan sang Sentrong Samahan ng Tsuper at Operators sa Negros (SSTON) nga wala na sang pulos ang ila mga ginapatigayon nga transport strike bangud tuman na ka kabalan ang gobyerno sa padayon nga pagsaka sang presyo sang produktong petrolyo.
Sa interview sang Bombo Radyo kay SSTON Secretary General Eduardo “Junjun” Asis, ginpahayag sini nga kun seryoso ang gobyerno, dapat ginsuspend na ang oil deregulation law nga madugay na nga panawagan sang mga transport group.
Dapat man suno sa iya, i-monitor ang mga oil company nga nagasabutahi kun sa diin ginatago ang mga supply sa tion nga may dako nga pagsaka sang presyo sang gatong.
Suno kay Asis, ang Department of Energy (DOE) ang nagamonitor lamang apang wala may ginahimo kun paano ini masolusyunan.
Ginkwestyon man sini kun ngaa ginsuspend ang P12-per-liter public utility vehicle (PUV) fuel discount nga suno sa iya, indi man sa gihapon madayon ang Barangay and Sangguniang Kabataan Elections (BSKE).
Pahayag sini, dapat unahon sang gobyerno ang produktong petrolyo nga suno sa iya, amo ang ginagamit sang mga pumuluyo kada adlaw.Samtang, nagpaandam ang Sentrong Samahan ng Tsuper at Operators sa Negros (SSTON) Secretary General Eduardo “Junjun” Asis nga tipunon nila ang tanan nga transport group kag desisyunan nga mauntat nalang sila sa pagbiyahe kun indi na nila maagwanta ang tuman ka mahal nga presyo sang diesel.
Ini bangud suno kay Asis, bisan makapila pa sila magsinggitan, tuman na ka kabalan ang gobyerno kag wala man sila ginapamatian.
Luwas diri, suno kay Asis, makaperwisyo pa sila sa mga motorista sa dalanon bangud sa makapila ka beses nila nga pagpatigayon sang transport strike.
Ginpahayag ni Asis, ila ginahimo subong, nagapadala sila sang sulat direkta sa national government nahanungod sa mga fuel subsidy nga mahatag sa ila.
Sa pihak sini, suno sa SSTON Secretary General, indi man sa gihapon uniform ang hatagay sang ayuda kun sa diin suno sa iya, 50 percent lang ang nahatagan samtang ang katunga ang wala na nakalab-ot sa iban.
Ginpanawagan ni Asis nga hingyo lang gid sang mga transport group nga panuboan ang presyo sang produktong petrolyo bangud pinaagi sini, mabatyagan sang mga pumuluyo nga ang tanan nga presyo ang magnubo man.
