Wala sang plano ang United Negros Drivers and Operators Center (UNDOC) nga mag-upod sa patigayunon nga transport strike sang pila ka transport group sa Lunes kag Martes.
Sa interview kay UNDOC Secretary General Diego Malacad, sila ang magapatigayon sang aktibidad sa Miyerkules agud ma-edukar ang mga driver kag operators sa nagalapta nga mga pagpatalang nga impormasyon.
Suno diri, ang away sa kontrobersyal nga Public Utility Vehicle Modernization Program ang indi na away sa National kundi nagdangat na sa paghabuyanay sang akusasyon sang mga leader sang transport group.
Gin-athag man ni Malacad nga malapit sila nga mag-abyan ni MANIBELA President Mar Valbuena antes paman ang pandemic tubtob sa karun.
Apang ginpaathag na sini kay Valbuena nga sila ang indi mag-upod sa kawsa karun nga nakita sini nga ginalaktan na sang pamulitika ukon mga may tuyo nga magpapili sa 2025 Midterm Elections ang panawagan sang ila sektor.
Suno diri, humalin pa sang 1987 ang pagpakigbato sini sa kinamatarong sa dalan, kag para sa iya ang lehitimo nga transport strike ang gina-updan bisan sang mga pribado nga indibidwal kag mga kapulisan.
Antes magpatigayon sang transport strike, dapat man nga una pahibaluon ang mga pampubliko nga eskwelahan, pribado nga unibersidad, gina-imbetar ang simbahan kag nagakuha sang permit sa ciudad.
Ini agud sila ang indi mabasulan sa pagkalate sang mga estudyante kag trabahante.
Suno diri, sadto nagapatigayon man sang unity forum kag naga-imbetar sang media agud mas mapalapta ang impormasyon tuhoy sa patigayunon nga transport strike.
Apang sa karun, gulpyada na lamang nagadeklarar nga wala man lang sang abiso sa mga maapektuhan nga eskwelahan kag negosyo.
Nagapangayo man ini sang pasaylo sa pagcritize sa sahi sang pagprotesta nga may kaupod nga pagpang-abusar ukon pagpangguba sang mga nagabyahe nga salakyan.
Paathag sini nga wala sila nagapamatok sa rally-protesta, apang indi nila luyag nga makilala ang transport sector sa Bacolod nga damak kag bastos nationwide.
Nakasugilanon naman sila sa Federation of Bacolod City Drivers Association (FEBACDA) kag Sentrong Samahan ng mga Tsuper at Operators Negros (SSTONE), nga lunsay magapadayun man sa pagbyahe.
