Plano sang Bacolod Alliance of Commuters, Operators and Drivers (BACOD) – MANIBELA nga mag-upod sa kilos protesta para sa International Human Rights Day sa Domingo, Desyembre 10.
Sa interview sang Bombo Radyo Bacolod kay Rudy Catedral, presidente sang BACOD-MANIBELA, sa Desyembre 10 sila ang magapatigayon sang parada halin alas-2:00 tubtob alas-3:30 sang hapon kaupod ang nanarisari nga kaparian sa Negros Occidental.
Paathag ini nga ang rally kag pagprotesta nila sa ciudad sang Bacolod ang kabahin pa sa Nationwide Transport Strike bilang pagkontra sa pahayag sang Land Transportation Franchising and Regulatory Board (LTFRB) nga tubtob na lamang sa Desyembre 31 ang Provisional Authority para sa mga Traditional Jeepneys.
Kun sa diin ang mga indi magpaconsolidate ang indi na makabyahe sa Enero 1 sa masunod nga tuig.
Sa pag-upod sa parada sang International Human Rights Day, luyag nila nga ipakita nga sila ang biktima man sang human rights bangod amat-amat nga gindula ang ila pangabuhian kag tuyo pa nga dulaon nagid ang ila nga prangkisa.
Magluwas diri, ginabantayan man nila ang mangin pahayag ni MANIBELA Chairman Mar Valbuena, sa pagpatigayon sang asod-asod nga mga untat-byahe humalin sa Desyembre 13 tubtob na sa 31.
Ini agud mapakita sa gobyerno nga sila ang tuman ka dehado sa modernization program.
Paathag ni Catedral nga tentative pa ang petsa sang untat-byahe kag sa tion nga magpagwa ang LTFRB sang memorandum circular nga nagakanselar sa pag-untat sang paghatag sa ila sang provisional authority, ila man nga untaton ang pagpatigayon sang untat-byahe.
