Nagahingyo ang secretary general sang Sentrong Samahan ng mga Tsuper at Operators ng Negros (SSTONE) sa national inter-agency task force kag Department of Transportation nga ikonsiderar ang sitwasyon sang mga drivers kag indi lang kuntani pag-istriktuhon ang one meter distance sa mga pampubliko nga salakyan.
Sa interview sang Bombo Radyo kay SSTONE secretary general Jessie Ortega, ginpahayag sini nga 60 tubtob 70% pa lang sang mga public utility jeepney (PUJs) ang nagbyahe sa una nga adlaw nga pagpaidalum sang Bacolod City sa general community quarantine.
Suno kay Ortega, amat-amat naman nga nagahatag sang warning ang Land Transportation Office sa mga jeepney drivers natuhoy sa one meter distance sang mga pasahero.
Suno sa iya, kun matuod-tuod nga sundon gid ang isa ka metro nga distansya sa mga jeep, magadangat lang sa anum ka mga pasahero ang sarang nga mapasakay sang mga drivers.
Suno diri, kun istriktuhon gid ang pagpatuman diri, madamo nga mga drivers ang mauntat na lang sa pagbyahe bangud ang ila nga benta ang kulang pa sa pangbakal sang krudo sang salakyan.
Suno sa secretary general, maputo kag mamierde gid sila ilabi na nga kun may mga pasahero nga nagabayolar sa health protocols, sila man ang ginahatagan sang penalidad.
Gani nagahingyo ini sa mga pasahero nga mag-obserbar kag magsunod sa mga health protocols ilabi na sa insakto nga pagsuksok sang faceshield kun nagasakay sa jeep.
Nagalaom si Ortega nga kuntani makalab-ot sa nakatungdan ang hingyo sang grupo bangud magluwas sa malapit isa ka bulan na nga wala nakabyahe ang kalabanan sa mga drivers bangud sa pagsuspendi sang pampubliko nga transportasyon, indi gid makaigo ang ila nga benta sa isa ka adlaw kun hugton pa gid ang protocol tuhoy sa one meter distance.
Nagapati man ini nga nakaigo na ang barriers, facemask, face shield kag mga alcohol bilang proteksyon agud matapna ang virus gani indi na kinahanglan nga hugton pa ang distansya sang mga pasahero.
