Nagpanawagan ang presidente sang Bacolod Alliance of Commuters, Operators and Drivers (BACOD) sa gobyerno nga solusyonan ang asod-asod nga pagsaka sang presyo sang produktong petrolyo.
Ini kasunod sa ginalauman nga bigtime oil price hike sa Martes.
Lauman nga magasaka ang presyo sang gasolina sa P1.35 tubtob P1.60 kada litro, diesel sa P2.30 tubtob P2.60 kada litro kag kerosene sa P2.30 tubtob P2.50 kada litro.
Sa interview sang Bombo Radyo Bacolod kay Rudy Catedral, isa na naman ini ka dugang nga kabudlayan sa bahin sang tranportasyon.
Suno diri, ini na sa karun ang ikatatlo nga semana sa bulan sang Enero nga may increase sa oil prices nga may dako nga epekto sa mga magagmay nga drivers kag operators bangod nagadangat sa 15 tubtob 20 ka litro ang maconsume nila.
Pahayag ni Catedral, indi man nila luyag nga mag-antos ang mga pumuluyo kun magsige-sige ang saka sa plete.
Nagapanawagan ini sa karun sa gobyerno nga hatagan sang solusyon ang asod-asod nga saka sang presyo sang produktong petrolyo.
