Nagalaom ang transport group sa Negros Occidental nga indi lang magdangat sa P60 ang presyo sang diesel.
Sa advisories sang mga oil companies kaina sang udto, P2.10 ang saka sa presyo sang gasolina samtang P3.50 naman ang saka sa presyo sang diesel bwas sa aga.
Suno kay Albert Villanueva, chairman sang Sentrong Samahan ng mga Tsuper at Operators – Negros, wala pa nakapabutyag ang gobyerno kun ano ang sarang sini nga mabulig sa mga may salakyan kag sa nagabyahe sang depampasahero nga salakyan.
Suno kay Villanueva, istorya lang ang fuel subsidy apang wala man ini nagatupa gani wala sila sang liwan nga mahimo kundi atubangon ang mga pagpanghangkat sa byahe.
Pagaistoryahan naman nila kun ano ang masunod nga tikang kun magsige-sige ang pagsaka sang presyo sang gatong.
Indi mapaktan suno sa iya ang presyo sang diesel kag gasolina apang nagalaom ini nga indi lang maglab-ot sa P60 ang presyo sang diesel.
Suno diri, masarangan pa sang mga driver ang presyo apang nagakuriit man ang mga ini.
Aminado si Villanueva nga indi lang problema sang transport sector ang oil price hike kundi tanan nga nagagamit sang salakyan kalakip na ang mga trucking services.
Tinalikdan nga tuig, mas mataas pa diri ang presyo sang gatong.
