Magapasaka sang plete ukon magapatigayon sang untat byahe ang option nga pilian sang United Negros Drivers and Operators Center (UNDOC) sa patigayunon nga meeting sang coalition sa Miyerkules may kaangtanan sa asod-asod nga pagsaka sang presyo sang gatong.
Sa interview sang Bombo Radyo kay UNDOC Secretary General Diego Malacad, ginahulat pa nila ang actual nga rate sang oil price hike nga gina-implementar Martes nga adlaw kag sa Miyerkules, sa ila patigayunon nga meeting pagadiskusyunan kun dayunon sang mga ini ang pagpasaka sang plete ukon pagpatigayon sang Untat Byahe.
Ginalantaw nga magadangat sa P25 ang mangin plete sa mga jeep nga nagabyahe sa first five kilometer kaangay sang Handumanan kag Alangilan.
Suno diri, ang P8.00 nga plete ang gin-implementar sang yara pa lamang sa P30 tubtob P40 ang presyo sang gatong samtang kun P40 tubtob P50 naman ang gatong, P10 tubtob P15 ang nagakadapat nga plete.
Bangud nga nagadangat sa P80 ang presyo sang gatong sa karun, P25 na suno kay Malacad ang ila ginapropose nga plete.
Suno sa secretary general, ang ikaduha nga option amu ang pagpatigayon sang Untat Byahe ukon Driver’s Holiday bangud sa tuman nga pagsaka sang presyo sang produktong petrolyo.
Pinakaulihi nila nga option suno kay Malacad amu ang magkamang ang mga drivers humalin alas 4:00 sang kaagahon tubtob alas 8:00 sang gab-i apang ang income ang husto lamang magkadto sa gatong kag arkila sa salakyan.
Suno diri, makaluluoy ang pamilya sang mga drivers kag kainit ang ila nagakabatyagan bangud wala gid sila sang mapangayuan sang bulig.
Suno sa iya, indi man sila makapangayo sang bulig sa Malacañang kag local government unit bangud sako ang mga ini sa transition samtang “lutong makaw” naman ang Department of Energy.
Nagalaom ang UNDOC nga maghatag sang pronouncement sanday Negros Occidental Governor Eugenio Jose “Bong” Lacson kag Bacolod City Lone District Congressman Greg Gasataya nga magahatag sang assistance sa mga transport groups kag kuntani ang calamity fund ang igapanagtag sa transport industry bangud makabig nga tuman ka dako nga kalamidad sa karun ang asod-asod nga pagsaka sang presyo sang gatong.
