Nagahingyo ang secretary general sang United Negros Drivers and Operator Center (UNDOC) sa mga stakeholders kag commuters nga makapadala sang representatives sa patigayunon nga Unity Forum sang transport sector sa Miyerkules, Marso 10, ala 1:00 sang hapon.
Sa interview sang Bombo Radyo kay UNDOC Secretary General Diego Malacad, magapatigayon sila sang Unity Forum kaupod ang mga stakeholders agud madiskusyunan ang validity sang untat byahe nga ginplanuhan nga patigayunon sa sulod sang lima ka adlaw.
Sa karun ila pa ginadihon ang venue sang patigayunon nga forum.
Suno kay Malacad, ang forum ang masami nga ginapatigayon 15 ka adlaw antes ang transport strike.
Suno diri, ila pagaistoryahan ang demand sang transport sector sa local government unit nga kun sarang marecall ang endorsement sini tuhoy sa modernization program.
Pagadiskusyunan man ang demands sa national government tuhoy sa pagdefer sang full implementation sang value added tax kag ireview ang excise tax sa petrolyo sa karun nga may nagaluntad nga gyera sa tunga sang Ukraine kag Russia, nagarecover sa pandemic kag sa Typhoon Odette.
Ginakasubo man sang mga drivers kag operators ang pagdemand nga magpasaka sang P2.50 sa plete bangud naintindihan nila nga nagaantos man ang mga pasahero.
Gani sa unity forum pagaistoryahan kun sarang nga indi na sila magdemand sa Land Transportation Franchising and Regulatory Board (LTFRB) kag kun may sulusobra naman lamang ang mga pasahero, hatagan na lang ang mga drivers agud indi sila matam-an.
Suno sa iya, paagi diri, maistoryahan man kun ano ang pinakaposible nga solusyon sa nagalala nga problema sa Pilipinas kag mapakita ang realidad kag sitwasyon ilabi na sa transport sector.
Nagahingyo man ini kay Negros Occidental Governor Eugenio Jose “Bong” Lacson kag Mayor Evelio “Bing” Leonardia nga magpakita sang interes sa mga hingyo sang pumuluyo.
