Nagdihon sang sulat ang United Negros Drivers and Operator Center may kaangtanan sa pagpamatok sang mga ini sa implementasyon sang Public Utility Vehicle Modernization Program (PUVMP) kag igapasa sa Sangguniang Panlungsod subong nga adlaw.
Ini ang kasunod sa pag-endorso sang ciudad sang ordinansa nga nagaduso sa pagphase-out sang mga salakyan sa idalom sang jeepney modernization program kay Land Transportation Franchising and Regulatory Board (LTFRB) Chairman Martin Delgra III sang Enero 12.
Sa interview sang Bombo Radyo kay UNDOC Secretary General Diego Malacad, nagpatigayon sang caravan kahapon ang mga transport groups sa Bacolod nga gintambungan sang UNDOC, Sentrong Samahan sang mga Tsuper at Operators sa Negros (SSTONE) kag Federation of Bacolod Drivers Association (FEBACDA) kag mga urban groups agud ipalab-ot sa local government ang ila pagpamatok sa modernization program.
Suno kay Malacad, nagdihon sila sang sulat kag igapasa ini sa Sangguniang Panlungsod bwas nga adlaw.
Suno sa iya, wala gid sila nakahibalo nga gin-endorso na sa central office ang programa nga wala nag-agi sa insakto nga proseso.
Suno diri, dapat may yara sang public hearing ukon public consultation nga patigayunon apang gindihon ini sang ciudad nga wala sang hearing sa mga stakeholders.
Nagapanawagan man ini kay LTFRB chairman Delgra nga indi magpabungol-bungol kag pamatian ang ila hingyo.
Nagahingyo man ini kay Mayor Evelio “Bing” Leonardia nga hatagan sila sang tiyansa kag mapungkuan ang ini nga topiko agud ila madiskusyunan ang pagahimuon nga solusyon.
