Nagpatigayon sang silent protest ang pila ka mga transport groups sa ciudad sang Bacolod sa panawagan nga sila ang atubangon ni Bacolod City Mayor Alfredo ‘Albee’ Benitez angot sa Traditional Jeepney phase out.
Nagprotesta ang Bacolod Alliance for Commuters, Operators and Drivers Incorporated (BACOD), Kabakod Negros Transport Coalition Incorporated (KNETCO) kag United Negros Drivers and Operators Center (UNDOC), kaina alas- 9:00 sang aga kag nagtapos alas-10:00 sang aga sa atubang sang Bacolod City Government Center.
Sa interview sang Bombo Radyo kay BACOD President Rudy Catedral, yara si Bacolod City Police Office Director Colonel Joeresty Coronica kag Gen. Primitivo Tabujara, pinuno sang Public Order and Safety Office (POSO) nga nag-atubang sa mga transport groups.
Suno kay Catedral, luyag lamang nila nga maatubang si Benitez apang wala sila ginpahanugotan bangod nga wala sila sang official request dugang pa sa karun nga yara sa luwas sang pungsod ang alkalde.
Pahayag ni Catedral, naghatag sang pasalig si Tabujara kag City Legal Officer Atty. Romeo Carlos Ting Jr. nga sila ang atubangon sang alkalde apang dapat nga maschedule ini.
Apang, suno kay Catedral kun wala sa gihapon sang maayo nga resulta ang ila pakighinun-anon, sila ang magakasa sang isa ka semana nga transport strike.
