Ginpanugyanan ang transport groups sa Bacolod nga iconsolidate ang ila sentimyento kag request kag ipasa bilang position paper bangud ini ang hatagan sang nagakaigo nga tikang sang mga opisyales sang ciudad.
Kahapon, ginpamatian ni Bacolod City Lone District Congressman Greg Gasataya ang sentimyento sang transport group sa Bacolod kadungan sang dayalogo.
Suno kay Gasataya, Miyerkules kuntani ang meeting apang bangud alang-alang sa schedule, ginpatigayon nalang ini kahapon.
Aminado ang kongresista nga may sense of urgency ang ila hingyo bangud madamo ang depampasahero nga salakyan nga wala nahatagan sang provisional authority bangud sa modernization program.
Bangud sini, ginhingyo ang transport groups nga isumite ini bilang position paper agud makarequest sang dayalogo sa LTFRB agud maaddress ang problema sang transport sector sa Bacolod.
Suno kay Gasataya, welfare sang mga pasahero kag livelihood sang mga driver ang ginaistoryahan gani nagakaangay gid nga kadtuan diri sang mga opisyales sang LTFRB.
Ang hingyo naman sa dugang nga pamasahe ang igadiretso nalang bilang petisyon sa LTFRB.
Suno kay Gasataya, provisional authority ang gintutukan nila sa pagsinapol kahapon.
Ang hingyo angot sa suspension sang excise tax naman ang ipaagi nalang bilang position paper bangud magabukas naman ang 19th Congress sa Hunyo 30.
