Ginpalab-ot sang transport group ang ila nga mga concerns kag mga frustrations sa ginpatigayon nga dialogo kaupod ang katapo sang Land Transportation Franchising and Regulatory Board (LTFRB) Region 6 kaina sang aga.
Isa sa mga concerns nga ila ginpalab-ot sa LTFRB 6 amo ang fuel subsidy nga ginahatag sang gobyerno kun sa diin 15 porsyento lamang ang nakabaton sa tatlo ka tranche kag kalabanan ang nagakadto sa mga operator apisar nga ang mga driver ang nagapangabudlay sa pagbiyahe.
Sa interview sang Bombo Radyo Bacolod kay Bacolod City Lone District Congressman Greg Gasataya, agud nga mahimuan sang solusyon ang ginayamo sang mga drivers sa syudad, pagakuhaon pa ang data base sa LTFRB agud mahibaluan kun pila ang mga benepisyaryo sang fuel subsidy sa syudad sang Bacolod.
Kasunod sini diskusyunan ang proposal sang transport sector nga magpasa sang listahan kun sa diin nabutang ang pangalan sang jeep, pangalan sang tag-iya sang prankisa kag pangalan sang driver, agud nga masibo sa listahan sang LTFRB.
Isa man sa yamo sang mga drivers ang sell and transfer sang prankisa nga wala ginapahanugutan kaangay lamang sang iban nga operators nga nabaligya na ang prankisa apang wala nakapangalan sa ginbaligyaan gani indi makaavail sang subsidy bangud nakapangalan pa ang salakyan sa daan nga tag-iya.
Pagahulaton naman sang opisina sang kongresista ang sabat sang LTFRB sa nangin dialogo kaupod sang transport group antes magpatawag liwat sang isa pa ka dialogo kaupod si LTFRB 6 Regional Director Richard Osmeña agud nga mapalab-ot man ang mga ginayamo sang mga drivers kasubong man kay LTFRB chairman Martin Delgra.
Samtang sa bahin naman ni Congressman Joseph Stephen Paduano, Minority Floor Leader sa House of Representatives, ipalab-ot man sini ang sentimiyento sang mga drivers kay Congressman Edgar Mary Sarmiento, ang chairman sang committee on transportation sa House of Representatives agud mahatagan sang pagtamod.
