Dako ang pagpasalamat sang mga transport groups sa ciudad sang Bacolod nga napadal-an na sang Office of Ombudsman sang subpoena sanday Bacolod City Police Office Director Police Col. Joeresty Coronica, Police Lt. Col. Joery Puerto kag Police Major Eugene Tolentino angot sa gina-alegar nga illegal nga pag-aresto sa transport leaders.
Madumduman nga nagtipon sa dalan Lacson ang transport groups sang Setyembre 18, 2024 para magpatigayon sang rally sa gina-alegar nga wala sila gin-imbitar sa ginpatigayon nga transport summit.
Bangod wala nagsunod sa dispersal order, gindakop ang mga transport leaders kag ginbombahan sang tubig ang mga nagarally.
Suno kay Lilian Sembrano, presidente sang Kabakod Negros Transport Coalition Incorporated (KNETCO), nagfile ini sang kaso sa Cebu kag sa karun ginpadal-an na sang subpoena ang tatlo ka pulis.
Suno diri, may napulo ka adlaw sila para magpasa sang ila sabat sa Office of Ombudsman.
Nagapasalamat naman ini nga amat-amat na nga mahatagan sang hustisya ang natabo nga pagpangdakop sa ila.
Samtang, may yara man sang kaso nga ginpasaka ang kapulisan batok sa mga transport leaders nga involved sa natabo nga rally.
