Nagpatigayon sang rally protesta ang pila ka transport groups sa ciudad sang Bacolod agud manawagan sa sang solusyon sa gobyerno sa padayon nga pagsaka sang presyo sang produktong petrolyo.
Sa interview sang Bombo Radyo kay Rodolfo Gardoce, presidente sang United Negros Drivers and Operators Center (UNDOC)- Pagkakaisa ng mga Samahan ng Tsuper at Operator Nationwide (PISTON), nagapanawagan sila sa gobyerno nga hatagan sang solusyon ang asod-asod nga pagsaka sang presyo sang produktong petrolyo.
Suno diri, nagpatigayon sila sang rally protesta sa pagpati nga kun basi wala nakahibalo ang presidente kun ano ang matood nga problema sang pumuluyo.
Suno kay Gardoce, madamo sang magutman kag madulaan sang palanagbuhian sa kabudlay sang pagpangabuhi kag kamahal sang tanan nga balaklon.
Samtang, nagpahayag man ini nga ang P1.00 nga saka sa plete tuman ka nubo kag gin-athag sini nga nagpanawagan sila nga kun tani wala sang saka sa plete apang gin-aprubar naman sang Land Transportation Franchising and Regulatory Board (LTFRB) ang fare increase.
Nagpaandam naman si Gardoce sang posible nga matabo nga lapnagon nga rally protesta kag transport strike.
Samtang, nagdugay lamang sang 30 minutos ang rally kag nagbalik sila sa byahe agud may ma-income.
