Nagapati ang transport leader sang consolidated traditional jeepneys nga wala pa sang kaseguraduhan ang pasalig ni Land Transportation and Franchising and Regulatory Board (LTFRB) chairman Atty. Vigor Mendoza II nga mabalik ang prangkisa sang mga unconsolidated traditional jeepneys bangod wala man sang memorandum circular.
Sa interview sang Bombo Radyo Bacolod kay Samahan ng mga Tsuper and Operators Negros (SSTONE) Secretary-General Junjun Asis, antes ang mosyon sang Bacolod Alliance of Commuters, Operators, and Drivers (BACOD)-MANIBELA, nagatangkas na ang mga nauna nga mosyon nga ginpadala sa LTFRB.
Pahayag ni Asis nga bisan sila nga consolidated na ang nagpadala naman sang madamo na nga mga mosyon apang wala gihapon, samtang mas madamo pagid suno diri ang mosyon nga nafile ni Lilian Sembrano nga Presidente sang Kabacod Negros Transport Organization (KNETCO).
Bangod sa kadamo sang napadala na nga mosyon, ginalantaw sini nga mahimo madugay pa antes matalakay ang mosyon sang BACOD, luwas na lamang kun hatagan sang prayoridad sang LTFRB.
Suno diri, si Sembrano bisan ulihi na ang nag-apelar gid nga makasulod sa consolidation process.
Apang ang BACOD ang wala gid sang effort kag plano nga magsunod sa programa sang gobyerrno.
Pahanumdom ni Asis nga madamo na sang mga ginpromisa ang mga opisyal sang gobyerno nga tubtob sa sugid lamang apang nagakalipatan kag wala man ginatuman.
Gani mas magapati ini kun may-ara sang memorandum circular nga ipagwa ang LTFRB.
