Ginahulat pa sang Sentrong Samahan ng mga Tsuper at Operators Negros (SSTONE) ang guidelines gikan sa national IATF angot sa pagbalik sang byahe sang pampubliko nga mga salakyan sa idalom sang general community quarantine.
Suno kay Jessie Ortega, Secretary General sang SSTONE, ginahulat-hulat na sang mga ini ang pagpatuman sang general community quarantine agud nga liwat nga makabalik sa pagbyahe.
Ginpahayag ni Ortega nga wala pa ang mga ini sang nabaton nga klaro nga guidelines.
May yara naman sang pagsinapol sa Bacolod Government Center bwas, Mayo 15, kag diri ginalantaw nga igaplastar ang pagpatuman kag implementasyon para sa mga driver, nagikan sa nasyonal.
Nakahambal naman si LTFRB Region 6 director Richard Osmeña, nga dapat gid mapabilin nga iga-implementar ang social distancing pinaagi sa pagbutang sang partition nga plastic sa mga pulungku-an agud nga malikawan ang pagtuparay sang mga pasahero.
Samtang mapabilin naman sa 50 porsyento ang pahanugutan nga mangin pasahero sang tagsa ka jeep.
Apang bangod sa pagnubo sang pasahero, kaupod man nga naganubo ang income sang mga driver suno kay Ortega.
Ginalantaw man nga problema kun sin-o ang magahatag sang subsidy sa mga driver kun indi sila mahatagan sang konsiderasyon.
Samtang may yara naman sang ginpagwa nga statement ang national IATF nga may fuel subsidy nga igahatag sa mga pampubliko nga transportasyon, apang wala pa mahibaluan kun sa diin ini kuhaon kag paano igahatag sa mga drivers.
Magapabilin naman ang mga ini nga magabantay sang guidelines sa himuon sang pampubliko nga transportasyon kag kun ano ang tikang nga pagahimuon sang mga LGU.
