Ginakalipay sang transport sector ang pagdihon sang mga senador sang resolution nga temporaryo nga suspendihon ang pagpatuman sang Public Transport Modernization Program ukon PUVMP.
Sa interview sang Bombo Radyo Bacolod kay Rudy Catedral, presidente sang Bacolod Alliance for Commuters, Operators, and Drivers (Bacod) nga dako ang ila kalipay sa resolution nga gindihon sang 22 ka mga senador.
Suno kay Catedral, ginpasalamatan sini si Senator Raffy Tulfo kag Senator Chiz Escudero sa pagpanguna sa pagdihon sang resolution nga nagasuspend sang pagpatuman sang Public Transport Modernization Program.
Ginpahayag sini nga tuman man ang ila nga kalipay bangud sa pihak sang ila pagpamatok sa PUVMP, gin-updan sila sang mga senador sa ila kawsa nga isuspend ang nasambit nga programa.
Positibo man sila nga pirmahan ni President Ferdinand “Bong bong” Marcos Jr. ang resolution nga gindihon sang mga senador nga temporaryo nga suspendihon ang pagpatuman sang Public Transport Modernization Program ukon PUVMP.
Nagapadayon man ang pagbiyahe sang mga traditional jeepneys sa ciudad sang Bacolod.
