Magasunod man lang ang transport sector sa ipatuman sang ciudad sang Bacolod nga mandatory nga pagsuksok sang face mask sa public transportation kadungan sang pagsaka sang kaso sang COVID-19.
Sa interview sang Bombo Radyo kay Albert Villanueva, chairman sang Sentrong Samahan ng mga Tsuper at Operators sa Negros, depende sa implementasyon sang kasuguan, magatuman man lang diri ang yara sa transport sector.
Bisan si Villanueva ang nagasuksok pa man sang face mask tubtub subong bangud indi malipod suno sa iya nga yara pa ang virus.
Aminado ang SSTONE chairman nga magasunod man ang mga pasahero sa ginapatuman sang gobyerno.
Una nga ginpahayag sang Bacolod City Disaster Risk Reduction and Management office nga lunsay wala nabakunahan ang walo nga napatay bangud sa COVID halin sang bulan sang Enero tubtub bulan sang Abril.
Sa karon, ang ciudad sang Bacolod ang yara sa idalom sang Alert Level 1 samtang yara naman sa idalom sang Alert Level 2 ang probinsya sang Negros Occidental.
