Nangin matawhay ang ginpatigayon nga transport strike sang mga transport group kag gin-updan sang pila sector sa ciudad sang Bacolod.
Sa interview sang Bombo Radyo Bacolod kay Police Col. Eugene Rebadomia, Officer in Charge sang Bacolod City Police Office, ang mga kapulisan ang wala sang narecord nga bisan ano nga insidente sa ginpatigayon nga transport strike.
Suno kay Rebadomia, nagsunod man ang mga nag-upod sa transport strike sa ginhambalan nila sang BCPO bangud wala ang mga ini sang permit.
Suno diri, ang mga bagay nga ginhambalan sang mga ini ang ginalakipan sang indi mag-obstruct sa dalan, indi magtuga sang gamo sa dalanon kag siguruhon nga malimpyo kag wala sang basura kun sa diin ang mga ini nagpatigayon sang transport strike.
Suno sa City Director may yara sang masobra 100 ang nag-upod depende sa area.
Ginpakamaayo man sini nga ang mga organizer ang may maayo nga engagement sa mga kapulisan.
Ginhatagan man nila sang prayoridad ang pagdeploy sang mga police nga magabantay sa dalanon apisar pa nga may yara man sang deployment sa nagapadayon nga Panaad sa Negros Festival.
Nahibaluan nga lain-lain man nga lugar ang ginpatigayunan sang transport strike kaangay sang Bata Fly-over, Magsaysay Flyover, Bangga Patio kag may yara man sa Bacolod Public Plaza.
Samtang ginpahayag man ni Police Major Elmer Bonilla, Head sang Traffic Enforcement Unit sang Bacolod City Police Office nga wala man nagtuga sang kagutok sang trapiko ang ginpatigayon nga transport rally.
Suno kay Bonilla, may yara man nga traffic enforcers kag traffic enforcement unit personnel nga nag-assists agud nga masiguro nga wala sang naglapaw sa dalan nga nag-upod sa strike.
Nagpanugyan man ini sa mga commuters nga kun may yara sang ginapatigayon nga transport strike kun mahimo likawan nalang ang ginapatigayunan nga area agud nga masiguro nga indi madelay ang biyahe padulong sa pakadtuan.
