Ginpahayag ni Transportation Secretary Vince Dizon nga preparado ang gobyerno nga maghatag sang fuel subsidies sa masobra 1.1 million buses, jeepney, tricycle kag ride-hailing application drivers kun maglapaw ang presyo sang gatong sa 80 dollars ukon kapin P4,500 per barrel sa tunga sang konflikto sang Israel kag Iran.
Suno kay Dizon, preparado ang Marcos administration agud mag-implementar ang Fuel Subsidy Program (FSP) para sa public transport sector in accordance sa 2025 General Appropriations Act (GAA).
Suno sa transport chief, ang fuel subsidy ang igapanagtag paagi sa nagkalain-lain nga mga channels agud masiguro ang madasig kag efficient distribution kaangay sang Pantawid Pasada ukon fuel cards, registered e-wallets (GCash and Maya), bank-to-bank transfers, kag cash distribution paagi sa Land Bank of the Philippines.
