Ginpakigbahin sang aktres nga si Liza Soberano ang isa ka personal kag masakit nga estorya sang iya nga kabuhi paagi sa pagsaysay sang kabuhi sini humalin sang siya ang bata pa kun sa diin ginmarkahan sang instability, pagpang-abuso kag pagpanghangkat kasunod sang pagdako nga indi kumpleto ang pamilya.
Sa latest podcast, ginpahayag ni Liza nga siya ang ginbun-ag sang mga lamharon nga ginikanan nga sanday Jacqueline kag John kun sa diin ang mga ini ang may pila ka trabaho agud makakita sang ila nga kinawala.
Ginpakigbahin man sini nga ang ila nga iloy ang nagpakigbato sa crystal meth ukon illegal drugs addiction samtang ang amay sini ang nagapangatubang sang kaso matapos mangin imbulbado sa illegal drugs manufacturing, illegal firearms, kag paglapas sa restraining order antes pa man gin-deport sa Pilipinas.
Si Liza ang nabilin sa Estados Unidos kaupod ang iya nga iloy kag ang iya nga manghod, kag indi nangin maayo ang pagpadako sa ila.
Isa sa mga traumatic memories sini ang may kaangtanan sa nobyo sang iya iloy nga si Michael sang siya ang duha pa lamang ka tuig.
Suno kay Liza, matapos nga nagbulagay ang iya ginikanan, nag-umpisa sa pagdate ang iloy sini sa nasambit nga lalaki.
Suno diri ang lalaki ang indi gid maayo, kun sa diin ini ang may tion nga nagpangawat sang minivan sa kalsada kag gindala sila nga mag-iloy sang isa ka tuig pa lamang ang iya nga manghod.
Nagtinir sila sa van sa sulod sang pila ka adlaw, kag sila ang ginreport na sang pamilya sang iya iloy nga missing.
Ginbalikan man ni Liza nga nagtesting pa ini sa pagpalagyo apang siya ang nadakpan ni Michael kag sa baylo nga apinan, ginsinggitan pa ini sang iloy upod sa nobyo.
Gin-alegar ni Liza nga kun wala ang ila iloy sila ang ginasakit ni Michael.
Naaresto si Michael kag ang iloy ni Liza, gani sila nga mag-utod ang nabilin nga wala sang ginikanan.
Pila man ka foster home ang ginkadtuan sang mga ini antes nagtinir sa balay ni Melissa, ang classmate sang ila iloy sang high school.
Una makabig man nga safe place ang bag-o nga balay, apang sa ulihi nangin abusado na ang mga ini kag sila ang ginasulod sa isa ka kwarto nga daw priso, ginapakahuy-an sa tion sang family gatherings kag gintratar nga daw kaangay nga mga sapat.
