Ginbuhinan ni Davao City 1st District Representative Paolo Duterte ang mga pungsod nga iya pagabisitahan.
Suno kay Executive Director Jose Marmoi Salonga sang Office of the Secretary General sang House of Representatives, nga nangin duha na lang ini halin sa 17 ka pungsod.
Sa ginpatuman nga pagbag-o, ang nabilin nga pagabisitahan sini amo ang Netherlands kag Australia.
Gindugang pa niya nga ila nabaton ang una nga request sang mamalidha kag ang revised request nga nag-overlap sa mga adlaw sang session.
Nahibaluan nga magabalik ang sessions sang mga mamalidha sa Enero 26, 2026.
Madumduman nga una nga nagrequest sang travel clearance si Duterte sang Disyembre 1 nga magasugod kuntani sang Disyembre 15, 2025 tubtob Pebrero 20, 2026 nga nagalakip sang 17 ka pungsod.
Bangud sini, nagsulat sila kay Duterte nga magsumite sang dugang nga mga detalye kag bag-uhon ang request.
Sa revised travel request, ang Netherlands kag Australia na lamang ang ginpabilin, nga may petsa halin Enero 3 tubtob Enero 30.
Rasun sini nga bisitahon niya ang iya amay nga si former President Rodrigo Duterte, kag ang iya bata nga naga-eskwela sa Australia.
Nakapagkit man sa request nga ang tanan nga gastos ang magahalin sa iya kaugalingon nga bulsa.
