Patay ang 53-anyos nga tricycle driver matapos gintiro sang wala pa makilal-an nga suspect sa Brgy Salvacion, Murcia alas-6:05 subong nga aga.
Ginkilala ang biktima nga si Ernie Tuazon, anay security guard kag residente sang Hacienda Beri sa nasambit nga Brgy.
Sa interview sang Bombo Radyo kay Police Captain Honey Labaro, Acting Chief of Police sang Murcia Municipl Police Station, idul-ong kuntani ni Tuazon ang iya hinablos kag ang duha pa ka estudyante sa eskwelahan.
Samtang may kaistorya sa kilid sang dalan, may nagpalapit nga lalaki kag hinali siya nga gintiro sa ulo.
Gilayon naman nga nagpalagyo ang suspect upod ang duha pa ka persona nga sakay sa motorsiklo.
Suno kay Labaro, anum ka mga lupok ang nabatian samtang ginatumod pa kun ano nga armas-luthang ang gingamit sa krimen.
Padayon ang imbestigayon sang kapulisan sa pagtumod sang suspect kag ang motibo sa krimen.
