Patay ang isa ka tricycle driver nga nagaserbe man bilang barangay tanod matapos gintiro sang iya man mismo nga pasahero sa 13th Lacson Street, ciudad sang Bacolod kaina sang aga.
Ang biktima ginkilala kay Michael Hugo, 42-anyos, kag residente sang Purok Tilapia, Barangay 3 apang nagaserbe ini nga barangay tanod sa Barangay 2.
Suno sa mga nakakita sa insidente, babayi kag lalaki ang nagasakay sa tricycle ni Hugo kag hinali lang ini nga gintiro sang lalaki nga pasahero.
Nakapanaog pa si Hugo sa iya nga tricycle kag nakalakat sang pila ka dupa antes ginbawian sang kabuhi.
Wala naman nadakpan ang mga suspetsado matapos nga magpalagyo.
Suno sa misis sang biktima nga si Nerissa Hugo, gintawgan lang ini sang ila punong barangay nga patay na ang iya bana.
Suno diri, wala siya nakahibalo kun sanday sin-o ang nagsakay sa tricycle sang iya nga bana bangud santo sa naanaran, sa Purok Sigay lang ini nagabyahe.
Pahayag ni Mrs. Hugo, nga wala ini sang nahibaluan nga may kaaway ang iya bana.
Subong nga wala na ang iya mister, aminado ini nga mabudlayan siya sa ila nga pangabuhi bangud apat ang ila kabataan.
Pahayag naman ni Punong Barangay Emelda Banguanga sang Barangay 2, Bacolod City, wala ini sang masaway kay Hugo.
Suno diri, available sa barangay hall si Hugo kun may mga aktibidad nga kinahanglanon ang presensya sini kag siya man ang nagaserbe sang summon.
Si Hugo ang ginhatagan sadto sang livelihood kun sa diin may yara ini sang pumpboat para sa pagpangasag.
Natingala man ang punong barangay nga aga pa si Hugo nagbyahe sang tricycle kaina sang aga bangud sa kinaandan, nagapangasag ini antes magbyahe.
