Padayon pa karon nga ginapadalman sang kapulisan kun ano ka matuod nga involved sa gun running kag illegal drug activities ang tricycle driver nga gintiro-patay sang riding-in-tandem suspects sa Phase 2, Barangay Pahanocoy, Bacolod City nagligad nga Enero 6, 2021.
Madumduman nga nagamaneho sang tricycle si Noel Peraren, 54-anyos kag residente sang Purok Bantud, Barangay Pahanocoy sang ginsunod-sunod ini tiro sang mga suspetsado tubtob nga ginbawian siya sang kabuhi sa atubang sang isa ka tyangge.
Sa interview sang Bombo Radyo kay Bacolod City Police Office (BCPO) P/Lt. Col. Ariel Pico, ginpahayag sini nga indi pa nila ma-establish ang nawong sang mga suspetsado apisar nga nakuhaan sila sang CCTV footage bangud nga naka-helmet ang mga ini.
Nagagwa sa imbestigasyon sang kapulisan nga tumandok sang Cauayan si Peraren.
Ginserbehan man ini sadtong 2013 sang search warrant bangud sa paglapas sa Republic Act 10591 ukon Illegal Possession of Firearms kun sa diin nakapyansa man ang biktima para sa iya temporaryo nga kahilwayan.
Suno kay Pico, may mga natipon sila nga impormasyon nga imbolbado sa gun running kag illegal drug activities si Peraren apang padayon pa nila ini karon nga ginapadalman agud mahibaluan kun ano ang motibo sa pagpatay sa biktima.
